Wara li l-Eżekuttiv tal-PN, b’mod demokratiku, b’vot sigriet, għażel liema distretti li fihom se jkun hemm by-election, kien hemm uħud li l-għażla tal-Eżekuttiv ma għoġbithomx u ħassew li għandhom jgħidu dan pubblikament. Dawn il-kummenti qanqlu reazzjoni.
Hi stramba ħafna, kif kandidati li ħarġu ma’ Partit, li iġġieled l-elezzjoni fuq kemm l-istituzzjonijiet tal-pajjiż għandhom jiffunzjonaw, jikkontestaw għażla li saret b’vot sigriet, minn waħda mill-għola istituzzjonijiet tal-Partit – l-Eżekuttiv.
Hawn joħroġ b’saħħtu l-element ta’ ingredjent li kull politiku għandu jkollu – dik li jkun ta’ servizz. Politiku tajjeb ma’ jkunx f’Partit biss għax ikollu xi pożizzjoni jew kariga. Biex tgħin lill-Partit u tikkontribwixxi m’hemmx bżonn li tkun Deputat jew ikollok kariga. Jekk ma’ tgħaddix tiegħek ma jfissirx li l-għażla li għamel ħaddieħor hija żbaljata.
F’dan iż-żmien fejn se jsiru ħafna għażliet fil-Partit Nazzjonalista, għandna lkoll noqgħodu attenti li min se joffri ruħu, ma jkunx qed jagħmel dan għax għandu ambizzjoni personali, imma għax lest li jkun ta’ servizz għal ġid komuni.
maltanotes.com 